كشف الفنان الشاب تامر مجدي، من خلال حسابه الرسمي علي موقع الفيس بوك عن تطورات الحالة الصحية للفنانة ياسمين عبدالعزيز.
وكتب تامر مجدي: “ياسمين دخلت في غيبوبه تامه بقالها ١٤ ساعة بسبب خطأ طبي أثناء إجرأها عمليه ..ارجوكم ارجوكم ادعولها …الدعاء بيغير الأقدار ..ألطف بيها يارب”.
وكانت الفنانة ياسمين عبد العزيز، قد خضعت لعملية جراحية ثانية بعد خمسة أيام من إجرائها عملية جراحية أولى.
وطلب الفنان أحمد العوضي، الدعاء من الجمهور مجدداً لزوجته الفنانة ياسمين عبد العزيز، بعد دخولها غرفة العمليات.
كتب أحمد العوضي: “يمكن ببان قدامكم دايما قوي .. لكن الحقيقة أنا دلوقتي أضعف إنسان علي وجه الأرض عشان أنا روحي مش معايا … أنا ضعيف جدا من غيرك إنتي لازم تبقي كويسة ولازم تقومي بالسلامة … أنا لأول مرة أكتب من غير ما أكون مفكر أنا بكتب إيه وهكتب إيه … بس انتي هتقومي إن شاء الله بإذن الله عشان إنتي وعداني وعد وهتتفذيه”.
وتابع قائلًا: “انا عاوزك تبقي كويسه وتقومي عشان اقولك اني لو كنت ببينلك اني بحبك مره فالحقيقي واللي جوايا اني بحبك الف مره … وانا دلوقتي مش قوي زي ما انتي بتشوفيني انا دلوقتي ضعيف ضعيف جدا .. لحد ما تقوميلي تاني عشان زي ما انتي بتاخدي قوتك مني انا كمان باخد قوتي منك”.
واختتم أحمد العوضي، حديثه قائلاً: “قومي عشان انا بحبك… بحبك اكتر بكتيير من كل الكلام اللي انا كتبته .. اكتر بكتير من كل اللي عدينا بيه مع بعض من ايام حلوه ومواقف صعبه مرت علينا … اكتر بكتير حتي من الموقف اللي احنا فيه دلوقتي .. انا بحبك .. ادعولها تقوم بالسلامه زي ما انتو دايما بتدعولها بالنجاح والتوفيق .. هي دلوقتي محتاجه دعواتكم”.
