تصدرت الفنانة رحمة حسن، تريند مؤشر البحث على موقع جوجل خلال الساعات الماضية، بعد أن اتهمت المنتج هاني أسامة بأنه أخذ منها مبلغاً مالياً ولم يعيده لها وذلك عبر حسابها الشخصي على موقع التواصل الاجتماعي لتبادل الصور والفيديوهات “إنستجرام”.
وكشفت رحمة حسن أنها طلبت من المنتج هاني أسامة أن يُعطيها ما تبقى لها من أجرها من مسلسل سابع جار، لكنه رفض، مشيرةً إلى أنها طالبته بحقها، عندما تعرض والدها لوعكة صحية شديدة قبل وفاته، وأخبرته بالظروف التي تمر بها، لكنه رفض إعطائها أموالها، لتُفجع بعد ذلك بوفاة والدها بعد يومين فقط من رفضه مساعدتها، مؤكدةً أنها لن تتنازل عن حقها، ولن تنسى له هذا الموقف معها.
وكتبت رحمة حسن منشورًا، عبر حسابها الشخصي بموقع تبادل الصور والفيديوهات القصيرة انستجرام، قائلة: “كل الاحترام والتقدير للدكتور أشرف زكي.. على استجابته وسؤاله.. وأحب أوضح أن الفلوس اللي ليا عند هاني اسامة المنتج هي باقي أجري عن مسلسل سابع جار.. وكان ليا جزء كبير منها.. ولجأت للدكتور اشرف في ٢٠١٩ علشان يساعدني.. وحصل .. وإداني جزء بسيط من فلوسي”؟
وأضافت: “وللعلم الوقت ده كان بابا تعبان وفي المستشفي وهاني اسامه كان عارف وقلتله اني محتاجه الفلوس ارجوك.. ورفض بعدها يديني اي فلوس من باقي اجري ومكانش بيرد علي رسايل او مكالمات مني.. للاسف بابا اتوفي بعدها بكام يوم .. ومن ساعتها وانا تعبانه ومش ناسيه هو عمل معايا ايه .. وكان صعب عليه اني اطلب تاني من دكتور اشرف انه يتدخل لان هاني مش بيستجيب اصلا… وانا كنت تعبت من كتر مابطلب حقي وهاني بيتهرب.. بس بين كل فتره والتانيه كنت ببعتله رساله او اكلمه وبرضوا مافيش حاجه .. كل ده بمنتهي الذوق والاحترام والرسايل موجوده معايا من ٢٠١٨ كله على التليفون”.
وتابعت: “وطبعا الوقت بيعدي وانا معنديش شغل ماعنديش دخل .. تعبت وبعتله تاني من كام يوم وقلتله .. وبرضوا مافيش حاجه .. وكمان العقد بتاعي معايا ومخصوم منه الضرايب الي دائما بدفعها علي اي عمل بشارك فيه من زمان .. العقد بتاعي علي مسلسل ٦٠ حلقه .. هاني صور وذاع ٦٧ حلقه يعني ليا كمان ٧ حلقات مش موجودين في عقدي وماختش عليهم كمان اجر و ماطلبتش بيهم اصلا بس هو عارف ..الفكره انه طلع ان في كذا شخص في الشغل مش انا بس ، عندهم نفس الموقف مع هاني .. ويمكن بفلوس اكتر بكتير وفي نفس الموضوع والنقابات والقضيه وما الي ذلك”.
وذكرت: “اما بخصوص ان الدكتور اشرف طلب مني اني اروحله النقابه عشان نتكلم في الموضوع .. انا قلتله اني مش عايزه اتعبه اكتر من كدا معايا .. خصوصا اني عارفه اني مش نقابيه واني بشتغل بتصاريح ومش عايزه اضيع وقته خصوصا انه ساعدني قبل كدا.. وكمان عشان عارفه ان هاني مش بيستجيب عشان هو منتج فا تبع نقابه تانيه .. وكنت عارفه ان الدكتور اشرف كلمه قبل كدا في موضوع الفلوس ده و برضوا ماحصلش حاجه .. يعني لو كان عايز يدفع كان دفع من زمان .. المسلسل اتذاع وخلص وهاني عمل بعده كذا عمل .. انا قلت للدكتور اشرف اني مش هاقدر اجي لاني تعبانه واني مش هاشيل البوست لحد ماخد فلوسي .. لاني بحاول اجيب حقي الي بقالي ٣ سنين مش عارفه اجيبه”.
واختتمت: “شكرا لكل حد اهتم .. بس انا حبيت اوضح ايه الي بيحصل .. وشكرا لكل الي ساعد والي بيحاول يساعد ..وللعلم انا لسه ماخدتش فلوسي برضوا .. شكرًا واخيرا .. لم ادلي باي تصريح صحفي ولست مسؤله عن اي كلام يكتب عن بالنيابه عني”.
