كتب- محمد أبوالمجد:
قال الساحر كريس المصري، إن عمره 28 عامًا، وكان يحلم منذ صغره بأن يكون ساحرًا، مضيفًا: “كنت بتفرج على التليفزيون على ساحر اسمه ديفيد بلين، وكنت بشوفه يعمل سحر ويحط ورقة كوتشينة على رجله ويغمض عينه وتختفي”.
وأضاف “كريس” في حواره لبرنامج “صاحبة السعادة” على فضائية “دي إم سي” اليوم الاثنين: “كنت بقعد في أوضتي وأحط ورقة الكوتشينه على رجلي وأقلد الساحر وأصلي لربنا عشان تختفي ومكنش بيحصل حاجه”، موضحًا: “أبويا في نفس اليوم اشترى لعبة عبارة عن 4 ورقات تعملهم بزاوية معينة تلاقي الأرقام اختفت”.
وتابع: “أخذت من أبويا اللعبة وبقيت أعملها للعيال أصحابي في المدرسة، ولما كنت بشوف رد فعلهم على الخدعة كنت ببقى مبسوط أوي، ومكنتش أعرف أبويا اشتراها منين ولكني وقفت عن الخدع دي لما وصلت أولى إعدادي”.
وأردف “كريس”: “بدأت أدخل على اليوتيوب واشوف إزاي أعمل خدع واتعلمت كل الموجود، وقلت هفضل اتعلم كتير أنا عايز أتفرج على السحر اللي شوفته زمان، وقلت أني هبتكر الألعاب الجديدة”، مؤكدًا: “اتعلمت أني لما أصلي مطلبش من ربنا شيء بعينه أطلب منه يخليني أبقى متعلم عشان أعرف أعمل الشيء دا”.
وأوضح: “في ناس كتير بيقولولي انت مخاوي ولكن كل حاجه عبارة عن خفة يد”.
